Rechtlech Aspekter

Aktualiséiert den

 

Allgemeng Benotzungsbedéngungen (CGU) fir de Site

Jiddwereen, deen Informatiounen, Dokumenter, Produkter, Software a verschidde Servicer (zesummen d’"Servicer" genannt) benotzt, déi op dësem Site sinn, huet d’Gesamtheet vun de Begrëffer an den Hiweiser vun dësen allgemenge Benotzungsbedéngungen zur Kenntnis geholl a stëmmt dësen zou.

Mat "Organ" gëtt d’ëffentlech Autoritéit, de Ministère, d’Administratioun oder all anert ëffentlecht Organ bezeechent, déi eleng oder zesumme mat anere fir dëse Site verantwortlech sinn.

Dem Benotzer seng Flichten

Den Zougang zum Site kritt een iwwer Internet. De Benotzer erkläert, datt hien déi domat verbonne Risike kennt an se akzeptéiert. Hie muss sech virun Internetpiraterie schützen, andeems hien eng gëeegent a sécher Computerkonfiguratioun wielt.

De Lëtzebuerger Staat kann net responsabel gemaach gi fir e Schued, deen de Benotzer op dësem Site kéint kréien, sief dat direkt oder indirekt a Verbindung mat senger Navigatioun um Site an dem Benotze vun de Servicer sou wéi a Verbindung mat den Internetsitten, op déi um Site verwise gëtt.

D’Benotze vum Site ass gratis.

Gestioun vun de Cookien

Dëse Site benotzt Clientscookien. Dat si kleng Textfichieren, déi et erlaben, Informatiounen zum Benotzer senger Navigatioun um Site ze analyséieren (Heefegkeet vun de Visitten, Dauer vun de Visitten, Säiten, déi ofgeruff ginn, etc.).

Si gi vum Site an engem Repertoire ofgeluecht, deen et zu dësem Zweck um Benotzer sengem Computer gëtt. Dran opgelëscht si virun allem den Numm vum Server, deen se erstallt huet, en Identifiant a Form vun enger eemoleger Nummer an en Oflafdatum. Den eemolegen Identifiant erlaabt et dem Site, de Computer vum Benotzer bei all Visitt rëmzeerkennen. D’Cookië vun enger Sessioun gi vum Benotzer sengem Computer geläscht, esoubal d’Sessioun eriwwer ass. Allerdéngs bleiwen déi persistent Cookien um Benotzer sengem Computer bis ee Mount nom Enn vun der Sessioun erhalen.

De Benotzer ka selwer decidéieren, ob en dem Server vun dësem Site d’Erlabnes gëtt, fir Cookien op sengem Computer ze späicheren oder net. Hien huet zu all Moment d’Wiel, fir d’Optiounen a sengem Browser esou anzestellen, datt d’Cookië weder akzeptéiert nach gespäichert ginn. Ausserdeem kann hien zu all Moment, iwwer de Browser, Cookië läschen, déi scho gespäichert sinn.

D’Benotze vu verschiddene Funktionalitéite vum Site kann ageschränkt oder desaktivéiert ginn, wann de Benotzer d’Cookië vum Site refuséiert. Dem Benotzer gëtt geroden, säi Browser esou anzestellen, datt d’Cookië vum Site akzeptéiert ginn.

Ännerung vum Site

De Lëtzebuerger Staat behält sech d’Fräiheet vir, dëse Site ouni Ukënnegung weiderzeentwéckelen, ze änneren oder ze spären, dëst aus Grënn wéi Maintenance, Update oder wéinst all anerem Motiv, dat néideg ass.

De Lëtzebuerger Staat kann zu all Moment all oder en Deel vun den Informatiounen a Servicer, déi um Site enthale sinn oder ugebuede ginn, zeréckzéien, bäisetzen, vervollstännegen oder méi präzis duerstellen. De Lëtzebuerger Staat ka fir keen direkten oder indirekte Schued am Zesummenhang mat esou Ännerunge responsabel gemaach ginn.

Allgemeng Verantwortungsaschränkungen

De Lëtzebuerger Staat mécht säi Bescht, fir eng gréisstméiglech Verfügbarkeet vun dësem Site oprechtzeerhalen. Allerdéngs kann de Staat net responsabel gemaach ginn, wann de Site fir eng Zäit oder ganz géif ausfalen.

De Lëtzebuerger Staat suergt fir déi beschtméiglech Sécherheet vum Computersystem. Allerdéngs kann de Staat am Fall vun Attacken op de Computersystem oder am Fall vun zäitweilegem oder ganzem Ausfall vum Site net responsabel gemaach ginn.

De Lëtzebuerger Staat suergt dofir, datt d’Daten, déi op dësem Site an an de sozialen Netzwierker verëffentlecht ginn, esou exakt wéi méiglech sinn. Am Fall, wou en Update vun enger Informatioun oder engem Formulaire net gemaach gouf, bei engem Feeler beim Ëmgang mam System oder bei der Verschlësselung, bei Ongenauegkeeten oder Lacunnen an de bereetgestallten Informatiounen oder eventuellen Iertemer kann de Staat awer net responsabel gemaach ginn. D’Zil ass et, genee an aktuell Informatiounen aus verschiddene Quellen ze verbreeden, mee de Lëtzebuerger Staat kann awer net all Risiko vun engem inhaltleche Feeler vermeiden. Keng vun den Informatiounen, déi op dësem Site verëffentlecht ginn, gëtt sech den Usproch, vollstänneg ze sinn, oder stellt en Engagement vum Lëtzebuerger Staat duer. D’Duerstellungen an einfacher Sprooch an d’Iwwersetzungen dovun dénge just fir Informatiounszwecker. Verbindlech si just d’Gesetzestexter, déi am Memorial (Journal officiel du Grand-Duché de Luxembourg) verëffentlecht ginn. D’Informatiounen op dësem Site hunn en allgemenge Charakter. D’Informatiounen si kenge perséinlechen oder spezifeschen Ëmstänn ugepasst a kënnen deemno net als perséinlech, berufflech oder juristesch Berodung fir de Benotzer ugesi ginn. Wann de Benotzer perséinlech oder spezifesch Berodung brauch, muss en ëmmer déi kompetent Servicer vun de verschiddenen Administratioune kontaktéieren.

Verantwortungsaschränkung vum Site

Dëse Site ass ausdrécklech net responsabel fir all direkt an indirekt Konsequenzen:

  • vu Kompatibilitéitsfeeler tëschent dem offréierte Service an den Equipementer, den Applikatiounen, de Prozeduren oder Infrastrukture vum Benotzer oder vun Drëttpersounen;
  • vun enger Sécherheetsschwaachstell, déi vum Benotzer oder enger Drëttpersoun kënnt an, méi allgemeng, vun all Sécherheetsschwaachstell, déi net direkt dësem Site kann zougeschriwwe ginn;
  • vu Feeler an/oder Bedruch, begaange vum Benotzer oder enger Drëttpersoun;
  • vun engem eventuelle Mangel u Verfügbarkeet oder engem schlechte Fonctionnement vun de Systemer oder vun den elektronesche Kommunikatiounsnetzwierker.

Linken op extern Sitten

Am Sënn vum Benotzer sinn op dësem Site Linken op aner Sitten ze fannen, déi nëtzlech kéinte fir e sinn oder e kéinten interesséieren. De Lëtzebuerger Staat a besonnesch dat verantwortlecht Organ kontrolléieren net systematesch den Inhalt vun dëse Sitten. Deemno kéinten se net responsabel fir d’Inhalter vun dësen Internetsitte gemaach ginn, sief et um Niveau vun hirer Legalitéit oder der Richtegkeet vun den Informatiounen, déi een do fënnt.

Geeschtegt Eegentum

De Site, all seng Elementer (dorënner och de Layout) an och d’Informatiounen an d’Servicer sinn duerch d’Gesetzer iwwert d’geeschtegt Eegentum an d’Auteursrechter geschützt.

Souwäit net anescht uginn, accordéiert de Lëtzebuerger Staat keng Lizenz oder Geneemegung a Bezuch op d’Rechter vum geeschtegen Eegentum, déi hien op dëse Site, seng Elementer oder Servicer huet. Ausserdeem ass all vollstänneg oder partiell Reproduktioun vun den Informatiounen a Servicer, egal a wéi enger Form a mat wéi enge Mëttel, ouni schrëftlech Erlabnes vum Organ am Viraus net autoriséiert.

Souwäit net anescht uginn, ass de Benotzer autoriséiert, déi verfügbar Dokumenter an Informatiounen ënner follgende Konditiounen ze consultéieren, erofzelueden an erauszedrécken:

  • d’Dokumenter kënnen nëmme fir perséinlech Zwecker, zu Informatiounszwecker an an engem strikt private Kontext benotzt ginn;
  • d’Dokumenter an d’Informatiounen dierfen op keng Aart a Weis verännert ginn;
  • d’Dokumenter an d’Informatiounen dierfen net ausserhalb vum Site verbreet ginn.

D’Rechter, déi Iech uewen implizit oder explizit accordéiert goufen, stellen eng Benotzungsautorisatioun duer an op kee Fall en Oftriede vu Rechter, Proprietéit oder Anerem am Zesummenhang mat dësem Site.

Ännerung vun den allgemenge Benotzungsbedéngungen

Dës allgemeng Benotzungsbedéngunge kënnen zu all Moment an ouni Ukënnegung geännert oder ergänzt ginn, ofhängeg vun den Ännerungen, déi um Site gemaach ginn, vun der Entwécklung vun der Legislatioun oder aus all anerem Grond, deen als néideg gesi gëtt. Et ass um Benotzer, fir sech iwwer déi allgemeng Benotzungsbedéngungen fir de Site ze informéieren, an hie soll sech bewosst sinn, datt just déi aktuell Online-Versioun als déi gëllt, déi a Kraaft ass. Et ka sinn, datt vun enger Visitt um Site zu enger nächster déi besonnesch allgemeng Benotzungsbedéngunge geännert hunn, an et ass dann um Benotzer, fir déi lescht Ännerunge virun enger neier Visitt um Site ze liesen.

Applikabelt Recht an zoustänneg Geriichter

All Rechtssträit, dee mam Benotze vum Site a senge Servicer zesummenhänkt, ënnerläit dem Lëtzebuerger Recht a fält ënner d’exklusiv Kompetenz vun de lëtzebuergesche Geriichter.

Schutz vun de perséinlechen Donnéeën

Allgemenges

D’Donnéeë mat perséinlechem Charakter, déi de Benotzer matdeelt, gi konform zum Règlement (EU) 2016/679 vum Europäesche Parlament a vum Conseil vum 27. Abrëll 2016 iwwer de Schutz vun natierleche Persoune bei der Veraarbechtung vu perséinlechen Donnéeën an iwwer de fräie Verkéier vun dësen Donnéeë veraarbecht.

Well de Lëtzebuerger Staat, ausser den IP-Adressen an de Server-Loggen aus Sécherheetsgrënn, keng perséinlech Donnéeë sammelt, brauch de Benotzer seng Zoustëmmung net ze ginn, éier en op dëse Site geet.

De Verantwortleche fir dës Veraarbechtung ass dat fir dëse Site verantwortlecht Organ.

De Benotzer ka Reklamatiounen, déi mam Schutz vun Donnéeën, déi hie betreffen, zesummenhänken, iwwer déi respektiv Kommunikatiounskanäl, déi zur Verfügung stinn, an un de Verantwortleche schécken, deen an dësem Fall dat fir de Site verantwortlecht Organ ass. De Benotzer kann ausserdeem seng Reklamatioun beim Delegéierte fir den Dateschutz vum Organ iwwer d’Mailadress dataprotection@sip.etat.lu areechen. De Benotzer kann sech doriwwer eraus fir all Rechtssträit an deem Beräich un déi National Kommissioun fir den Dateschutz wenden (Commission nationale pour la protection des données - CNPD, 15, boulevard du Jazz L-4370 Belvaux).

Kontaktformulaire vum Site

D’Informatiounen, déi Iech betreffen an déi iwwer de Kontaktformulaire vum Site gesammelt ginn, gi vum betreffenden Organ veraarbecht, fir Är Demande kënnen ofzewéckelen.

Andeems Dir de Formulaire ausfëllt, akzeptéiert Dir, datt Är perséinlech Donnéeën am Kader vun Ärer Demande veraarbecht ginn. Dës Informatioune ginn esou laang gespäichert, wéi d’Organ brauch, fir den Zweck vun der Veraarbechtung ze erfëllen.

Well et vun der Demande ofhänkt, wéi laang déi matgedeelt Donnéeë versuergt ginn, deelt d’Organ op Ufro, Fall fir Fall, dës Dauer oder d’Krittären, fir d’Dauer festzeleeën, mat.

Zougrëff op Är Donnéeën huet d’Organ, dat fir Är Demande zoustänneg ass. Wann Dir wëllt wëssen, u wien d’Donnéeë vun dësem Formulaire weidergeleet ginn, da went Iech wgl. un d’Organ, dat sech mat Ärer Demande befaasst.

Esou wéi et am Règlement (EU) 2016/679 iwwer de Schutz vun natierleche Persoune bei der Veraarbechtung vu perséinlechen Donnéeën an iwwer de fräie Verkéier vun dësen Donnéeë steet, hutt Dir d’Recht, Är gespäichert Donnéeë kucken ze goen, se ze verbesseren oder, wann de betreffende Fall antrëtt, och läschen ze loossen. Ausserdeem hutt Dir d’Recht, Är Awëllegung zu all Moment ze widderruffen.

Wann Dir e valabele Grond hutt a virausgesat, datt d’Veraarbechtung vun Ären Donnéeë keen obligatoresche Charakter huet, kënnt Dir donieft och Widdersproch géint d’Veraarbechtung aleeën.

Wann Dir vun dëse Rechter wëllt Gebrauch maachen an/oder méi wëllt iwwer d’Veraarbechtung vun Ären Donnéeë gewuer ginn, dann adresséiert Iech wgl. un dat betreffend Organ, deem seng Coordonnéeën Dir um Formulaire fannt. Doriwwer eraus kënnt Dir och eng Reklamatioun bei der Nationaler Kommissioun fir den Dateschutz areechen (Commission nationale pour la protection des données - CNPD, 15, boulevard du Jazz L-4370 Belvaux).

Veraarbechtungen am Kader vun der Miessung vun de Visiteurszuelen

Gewëssen Donnéeën iwwer d’Material an d’Software vum Benotzer, mat deenen een hien net identifizéiert kritt, gi wärend senger Visitt um ëffentleche Site gesammelt. Dës Sammlung huet als eenzegen Zweck, fir eng Statistik vun de Visiteurszuelen kënnen opzestellen (Browser-Typ, Opléisung, ongeféier Lokalisatioun asw.), fir de Benotzer nach besser kënnen ze déngen.

Déi komplett IP-Adress vum Benotzer gëtt a kengem Fall versuergt. Well nëmmen en Deel vun der IP-Adress fir global Statistike versuergt gëtt, ass et a kengem Fall méiglech, de Benotzer ze identifizéieren.

Dës Donnéeë ginn an Europa an enger Solutioun versuergt an ënnerbruecht, déi vun engem Sous-traitant zur Verfügung gestallt gëtt, an dësem Fall vun der Firma Adobe Systems Inc., déi als Sous-traitant deene selwechte gesetzleche Flichten ënnerläit, wat de Schutz vun de perséinlechen Donnéeën ubelaangt, an dëst fir de Fall, wou esou Donnéeën an Zukunft sollte gesammelt ginn.

D’Donnéeë ginn net méi laang versuergt, wéi et Zäit brauch, fir d’Entwécklung vun de Visiteurszuelen op Basis vun der Entwécklung vun de Browseren, vun de benotzten Opléisungen a vun anere verfügbare statisteschen Donnéeën ze beobachten.

De Verantwortleche fir dës Veraarbechtung ass dat fir dëse Site verantwortlecht Organ.

Veraarbechtungen am Kader vun der Videoiwwerwaachung

D’Gebaier (Entréeën an Ëmgéigend) ënnert der Responsabilitéit vum Zenter fir Informatiounstechnologië vum Staat (CTIE), dorënner och de physesche Büro Guichet.lu, gi videoiwwerwaacht. D’Opname ginn entweeder an Echtzäit oder, wann néideg, zu engem spéideren Zäitpunkt duerch autoriséiert Personal veraarbecht, fir esou Intrusiounen oder onerlaabt Accèsen ze detektéieren. Sënn an Zweck vun dëser Veraarbechtung ass d’Sécherheet vun den Informatiounen, déi dem CTIE uvertraut ginn, esou wéi et am ofgeännerte Gesetz vum 20. Abrëll 2009 iwwer d’Grënnung vum CTIE, Artikel 2, Punkt b) virgesinn ass.

D’Videomaterial gëtt 30 Deeg laang gehalen, fir et ze erméiglechen, all Zort vun Intrusioun oder onerlaabtem Accès ze detektéieren, besonnesch déi Fäll vu béiswëllegen Aktiounen, déi reegelméisseg duerchgefouert ginn oder sech iwwer méi e laangen Zäitraum erstrecken. Dës Dauer gouf festgeluecht mat Bléck op de sensibele Charakter vun den Informatiounen, déi dem CTIE uvertraut ginn, an entsprécht och de Recommandatiounen an deem Punkt vun den zoustännegen Autoritéiten. Ass den Delai, fir d’Opnamen ze halen, ofgelaf, ginn se zerstéiert, et sief, et wier zu engem Tëschefall oder enger Infraktioun komm oder déi zoustänneg Police- oder Justizautoritéiten hätten d’Biller iwwermëttelt kritt oder saiséiert.

Empfänger an zoustänneg fir d’Veraarbechtung ass de CTIE.

Esou wéi et am Règlement (EU) 2016/679 iwwer de Schutz vun natierleche Persoune bei der Veraarbechtung vu perséinlechen Donnéeën an iwwer de fräie Verkéier vun dësen Donnéeë steet, kënnt Dir Accès op Är Donnéeë kréien, wann Dir dofir e valabele Grond hutt.

Wann Dir vun dësem Recht Gebrauch wëllt maachen, dann adresséiert Iech wgl. un den Helpdesk vu Guichet.lu:

  • iwwer den Online-Formulaire; oder
  • iwwer Telefon ((+352) 247 82 000) vu méindes bis freides tëschent 8:00 an 18:00 Auer.

Doriwwer eraus kënnt Dir och eng Reklamatioun bei der Nationaler Kommissioun fir den Dateschutz areechen (Commission nationale pour la protection des données - CNPD, 15, boulevard du Jazz L-4370 Belvaux).

Veraarbechtungen am Kader vum Accueil vu Visiteuren

Bei der Visitt vun engem vun den administrative Gebaier ënnert der Responsabilitéit vum CTIE, déi eng Receptioun mat Gardien hunn, gëtt d’Identitéit vun de Visiteure gepréift. Zu der Veraarbechtung gehéieren den Depot vun engem Identitéitsdokument vum Visiteur (Carte d’identité oder all anert Dokument, mat deem seng Identitéit iwwerpréift ka ginn) an d’Aschreiwung an e Visiteursregister. Als Echange kritt de Visiteur e Badge, duerch deen hien Accès an d’Gebai kritt. Esou wéi et an den Artikelen 20.1 an 20.2 vum geännerte Règlement grand-ducal vum 13. Juni 1979 iwwert d’Richtlinnen am Beräich vun der Sécherheet an der Fonction publique steet, brauche mir Är Donnéeën, fir d’Sécherheet an der Administratioun an e geschützt an effikasst Aarbechtsëmfeld zu assuréieren. Déi follgend Donnéeë sinn also am Register agedroen: de Numm, de Virnumm, eventuell d’Plackennummer an eventuell de Numm vun der Firma respektiv der Administratioun.

Dës Donnéeë gi 5 Joer laang gespäichert, fir d’Sécherheet vun der Administratioun ze assuréieren a spéider, wann néideg, Analysen ze realiséieren.

Empfänger an zoustänneg fir d’Veraarbechtung ass de CTIE.

Esou wéi et am Règlement (EU) 2016/679 iwwer de Schutz vun natierleche Persoune bei der Veraarbechtung vu perséinlechen Donnéeën an iwwer de fräie Verkéier vun dësen Donnéeë steet, kënnt Dir Accès op Är Donnéeë kréien, wann Dir dofir e valabele Grond hutt, an hutt d’Recht, wann de betreffende Fall antrëtt, Är Donnéeën ze verbesseren, läschen ze loossen an d’Veraarbechtung limitéieren ze loossen.

Wann Dir vun dësem Recht Gebrauch wëllt maachen, dann adresséiert Iech wgl. un den Helpdesk vu Guichet.lu:

  • iwwer den Online-Formulaire; oder
  • iwwer Telefon ((+352) 247 82 000) vu méindes bis freides tëschent 8:00 an 18:00 Auer.

Doriwwer eraus kënnt Dir och eng Reklamatioun bei der Nationaler Kommissioun fir den Dateschutz areechen (Commission nationale pour la protection des données - CNPD, 15, boulevard du Jazz L-4370 Belvaux).

 

Präsenz an de sozialen Netzwierker

Moderatiounspolitik

All Benotzer, deen dem CTIE an de sozialen Netzwierker bäitrëtt, engagéiert sech, fir all Form vun Diskriminatioun ze ënnerloossen, sief et opgrond vun der Rass, der Hautfaarf, der Relioun, dem Geschlecht, der sexueller Orientéierung, dem Alter, der nationaler Ofstamung, der Behënnerung, dem Familljestand oder och nach dem beruffleche Status.

Beleidegend, rassistesch, sexistesch oder verletzend Äusserungen hu keng Plaz an de sozialen Netzwierker. Se gi geläscht a gemellt. Kommerziell Inhalter ginn och geläscht.

Aus Confidentialitéitsgrënn gouf decidéiert, datt de CTIE net op Commentairen a privat Messagen op X oder LinkedIn äntwert. Wann Dir Froen hutt, Virschléi wëllt maachen oder op Problemer wëllt hiweisen, da kënnt Dir de CTIE kontaktéieren:

  • iwwer den Helpdesk vu Guichet.lu per Online-Formulaire; oder
  • iwwer Telefon ((+352) 247 82 000) vu méindes bis freides tëschent 8:00 an 18:00 Auer.

Sproochen

Op X an op LinkedIn kommunizéiert de CTIE haaptsächlech op Lëtzebuergesch an op Franséisch. Jee no Situatioun an Zilgrupp kënnen och Informatiounen op Däitsch oder op Englesch verbreet ginn. Et ass net auszeschléissen, datt d’Informatiounen, déi um X- oder LinkedIn-Account vum CTIE publizéiert ginn, op Sitte verweisen, déi net méisproocheg sinn.